في ناس كتير اتعرضوا للضرب أو العنف الأسري وهم صغيرين، وده بيسيب أثر في شخصيتهم حتى بعد ما يكبروا. وكان المبرر الوحيد اللي بنسمعه من أهلنا:
«"إحنا خايفين على مصلحتك... وبنربيك."»
وإحنا صغيرين مكنّاش فاهمين معنى الجملة دي، فكنا بنترجمها بطريقة بسيطة جدًا:
"هم بيكرهوني."
"أنا أكيد وحش."
"بابا وماما سيئين جدا."
لكن الحقيقة إن الطفل مبيعرفش يفرق بين العقاب ورفضه كشخص، فكل ألم بيتخزن جواه على إنه رسالة بتقول: "أنا مش محبوب.
فاكر؟ فاكر لما كنت صغير وبعد ما تاخد العلقة المحترمة، تجري تستخبى في ركن الأوضة! تغمض عينيك وتقعد تعيط... وبعد شوية تحس بوحدة، فتجيب لعبتك وتحضنها.
وتعلي صوتك في العياط، مستنيهم يسمعوك وييجوا يطبطبوا عليك ويقولولك: "حقك علينا."
لكن بدل ده كنت بتسمع:
«"مش هتبطل عياط وندب؟ ولا أجي أكمل عليك؟"»
ساعتها كنا بنخاف.. ونسكت.
الأيام بتعدي، والشهور والسنين كمان... لكن اللحظة دي؟ مستحيل تنساها..
حد هيقولي :
"إنتِ عمالة ترغي، وأنا محصلش معايا شئ زي كده، أو حتى مش فاكر."
هقولك: لو فعلًا محصلش معاك كدة ، فالمقال ده مش ليك يا غالي .
المقال ده للي عاشوا العنف الأسري وهم أطفال. وكبروا ومحدش حس بيهم وبوجعهم اللي لسة مستمر.
استنى... رايح فين؟
تعالى كمّل، إحنا هنهزر .
نخش في الجد بقى.
يا ترى إيه اللي بيخلي بعض الأهالي يعملوا كده؟
وإيه تأثير ده على أولادهم؟
والأهم... إزاي نبدأ نتعافى؟
أولًا: أشكال العنف الأسري:
العنف الأسري مش معناه الضرب وبس.
ممكن يكون:
1. العنف الجسدي.
2. الحرمان العاطفي.
3. الإهانة المستمرة.
4. التهديد والتخويف.
5. الحرمان من الاحتياجات الأساسية.
كل دي أشكال من العنف، حتى لو المجتمع بيعتبر بعضها "تربية".
ثانيًا: أسباب العنف الأسري:
في أسباب كتير، ومن أشهرها:
1. وجود خلل في شخصية الأب أو الأم.
وده معناه إنهم ممكن يكونوا غير أسوياء نفسيًا بالقدر الكافي للتعامل الصحي مع أولادهم.
2. إنهم اتعرضوا هما نفسهم لصدمات في طفولتهم.
و غالبًا ده اللي بيحصل الشخص بيكرر اللي اتعمل فيه وهو صغير، من غير ما يحس.
3. الضغوط النفسية أو الأمراض النفسية أو عدم القدرة على تحمل المسؤولية.
هتقول لي:
"يعني... مش أنا السبب؟"
لا يا عم... مش إنت السبب.
ولو في يوم صدقت إنك كنت السبب في اللي حصل، فأحب أقولك إن الطفل عمره ما بيكون مسؤول عن عنف الشخص الكبير.
السبب الحقيقي غالبًا بيكون عندهم هما، سواء كانوا مدركين لتصرفاتهم أو حتى مش مدركين.
ثالثًا: آثار العنف الأسري على الأبناء:
“شمر إيدك وعد معايا 🥲.”
ممكن العنف يسبب:
1. صدمات طفولة تستمر لسنين طويلة.
2. فقدان الشعور بالأمان.
3. البحث المستمر عن الحب والاهتمام بأي طريقة.
4. التعلق المرضي.
5. الاكتئاب أو القلق.
6. صعوبة في تكوين علاقات صحية.
7. الغضب والعناد المفرط.
8. الرغبة في الانتقام.
9. وفي بعض الحالات قد يساهم في ظهور اضطرابات نفسية أو اضطرابات في الشخصية
“ انا آسفة جدًا بجد بس دي الحقيقة “
طب والحل؟
أول شئ لازم نفهمه..
إن آباءنا وأمهاتنا غالبًا مش هيتغيروا بسهولة.
وممكن جدًا عمرهم ما يعتذروا على اللي عملوه، لأنهم أصلا هما مش شايفين انهم غلطانين.
الجملة دي مش هتساعدك فده بس لأ حقيقي هي أسلوب حياة :
«"المشكلة اللي ملهاش حل بنتعايش معاها."»
وده مش معناه إننا نقول إن اللي حصل كان صح، ولا معناه إننا ننكر وجعنا، لكن معناه إننا منسمحش للماضي إنه يتحكم في باقي عمرنا.
طيب أتعافى إزاي؟
1. اعترف إن اللي حصلك كان مؤلم، ومتقللش من وجعك.
2. سامحهم لو تقدر، مش لأنهم يستحقوا، لكن لأنك تستحق تعيش من غير الحمل ده.
3. لو الأذى لسه مستمر، حط حدود تحميك على قد ما تقدر.
4. اتعلم تحب نفسك وتديها الاهتمام اللي اتحرمت منه.
5. ولو لقيت إن الماضي لسه مسيطر عليك، متترددش تطلب مساعدة من شخص تثق فيه أو من طبيب نفسي او حد ثقة يساعدك طلب المساعدة مش ضعف، ابدأ..
“ثواني كدة، اممم حضرتك اللي رايح تحب وتتجوز، تعالى بعد إذنك، الله يهديك بجد .”
رايح تملى فراغ اتكون في سنين طويلة بعلاقة مدتها كام شهر؟
استنى اتعافى الأول، لأنك لو دخلت أي علاقة وإنت لسه بتحاول تعالج جروح طفولتك، ممكن تتحول العلاقة كلها لمحاولة يائسة تعوض بيها اللي فات، بدل ما تكون علاقة صحية بين شخصين، وساعتها تظلم نفسك والطرف التاني ولو في أولاد كمان، عشان متخليش جروحك تبقى جروح أولادك بعد كده.
“اكسر السلسلة.”
يمكن محدش قدر يحمي الطفل اللي كان جواك...
لكن النهارده، الشخص الوحيد القادر يحميه... هو إنت، سواء انت أب او انتِ أم
وفي النهاية...
خليني أسيبك مع سؤال واحد.
ايه الشئ اللي كان نفسك أهلك يعملوه معاك، ومعملهوش؟
“ وبس كدة “
“ صلو على النبي 🩷💕”
احس طريقة تربية العوائل العربيه هي تلاعب نفسي حته تصنع ابن مطيع بدون شخصيه في الغالب تخيل ويايه انت تنضرب على شيء تافه فا امك او ابوك يفرغ العصبيه وضغوطات اليوم بيك انت وتبلش تبچي
فابعدها يحضنك ويقلك احبك ويصالحك بهل حالة راح يصير عندك اضطراب رهيب اوتتعاقب على شيء غلط سويته وانت بعدك طفل ماتعرف هل شيء غلط احس لازم يسوو اختبار جدرة للتربيه
صراحة مقال مُعبر حيل ومفيد وغير انه ينطبق على الواقع 💯 .
شكراً لكِ🫶🏻💗💗.